नागरी सुविधांच्या अभ्यासासाठी आमदार विक्रांत पाटील यांचा लंडन दौरा
नागरी सुविधांच्या अभ्यासासाठी आमदार विक्रांत पाटील यांचा लंडन दौरा
भारतीय जनता पार्टीच्या १६ आमदारांमध्ये निवड; शहरी व्यवस्थापनाचा सखोल अभ्यास करणार
पनवेल दि. 15 (वार्ताहर) : महाराष्ट्रातील शहरी व्यवस्थापन अधिक सक्षम व परिणामकारक करण्याच्या उद्देशाने आमदार विक्रांत पाटील हे ता. १५ रोजी इंग्लंडची राजधानी लंडन येथे अभ्यासदौऱ्यासाठी रवाना झाले आहेत. महाराष्ट्र राज्य विधिमंडळाच्या आगामी अर्थसंकल्पीय अधिवेशनाच्या पार्श्वभूमीवर हा महत्त्वपूर्ण दौरा आयोजित करण्यात आला आहे.
या अभ्यासदौऱ्यात राज्यातील सत्ताधारी आणि विरोधी पक्षांतील एकूण १६ आमदारांचा समावेश असून भारतीय जनता पार्टीच्या वतीने आमदार विक्रांत पाटील यांची निवड करण्यात आली आहे. नागरी विकास, पायाभूत सुविधा आणि सार्वजनिक सेवा व्यवस्थेचा आंतरराष्ट्रीय स्तरावरील अनुभव घेण्यासाठी ही संधी महत्त्वाची मानली जात आहे.
लंडनमध्ये शहरी नियोजन, वाहतूक व्यवस्था, कचरा व्यवस्थापन, पाणीपुरवठा, सार्वजनिक आरोग्य सुविधा, डिजिटल प्रशासन आणि नागरिक-केंद्रित सेवा यांचा सखोल अभ्यास केला जाणार आहे. तेथील स्थानिक प्रशासनाच्या कार्यपद्धती, स्मार्ट सिटी संकल्पना, तसेच नागरिकांच्या सहभागातून राबविण्यात येणाऱ्या योजनांचा प्रत्यक्ष आढावा घेण्यात येणार आहे.
महाराष्ट्रातील वाढत्या शहरीकरणाच्या पार्श्वभूमीवर आधुनिक आणि शाश्वत उपाययोजना राबविण्याची गरज अधोरेखित होत आहे. या अनुषंगाने लंडनमधील प्रभावी शहरी मॉडेलचा अभ्यास करून त्यातील उपयुक्त बाबी राज्यातील शहरांमध्ये राबविण्यासाठी प्रयत्न केले जाणार असल्याचे सांगण्यात आले. विशेषतः महानगरपालिका व नगरपरिषदांच्या कार्यक्षमतेत वाढ, आर्थिक शिस्त, तंत्रज्ञानाचा वापर आणि नागरिकांना दर्जेदार सुविधा उपलब्ध करून देण्यासाठी या अभ्यासाचा उपयोग होणार आहे.
आगामी अर्थसंकल्पीय अधिवेशनात शहरी विकासासंदर्भातील धोरणनिर्मितीत या दौऱ्यातील निरीक्षणे व अनुभव महत्त्वाची भूमिका बजावतील, अशी अपेक्षा व्यक्त केली जात आहे. आमदार विक्रांत पाटील यांचा हा दौरा केवळ वैयक्तिक अभ्यासापुरता मर्यादित नसून महाराष्ट्राच्या शहरी भविष्यासाठी दिशादर्शक ठरणारा असल्याचे राजकीय व प्रशासकीय वर्तुळात बोलले जात आहे.
संपादक : नितीन जाधव
