आटपाडीत डॉ. सचिन मोटे व राहुल हजारे यांच्या समर्थनार्थ अनोखे आंदोलन; दुग्धाभिषेकातून व्यक्त केला ठाम पाठिंबा

March 29, 2026 पनवेल दिनांक

गोपीचंद पडळकर यांच्या आरोपांच्या पार्श्वभूमीवर डीडीएसआर ग्रुपच्या संचालकांचा सन्मान; घोषणाबाजीने परिसर दणाणला

विशेष (प्रतिनिधी): आटपाडी येथे आज सर्व समाजाच्या वतीने आयआरएस अधिकारी डॉ. सचिन मोटे आणि युवा उद्योजक राहुल हजारे यांच्या समर्थनार्थ अनोखे आंदोलन करण्यात आले. राजकीय वैमनस्यातून काही पुढाऱ्यांनी या दोघांवर चिखलफेक केल्याच्या घटनेचा तीव्र निषेध करत नागरिक मोठ्या संख्येने एकत्र जमले होते.

या आंदोलनावेळी संतप्त कार्यकर्त्यांनी डॉ. मोटे आणि राहुल हजारे यांच्या छायाचित्रांना दुग्धाभिषेक करून त्यांच्यावरील विश्वास आणि एकजूट दर्शवली. “समाजातील कर्तृत्ववान व्यक्तींवर अशा प्रकारचे घाणेरडे प्रकार करणे अत्यंत निंदनीय आहे. अशा प्रवृत्तींचा धनगर समाज तीव्र शब्दांत निषेध करतो,” अशी भावना यावेळी उपस्थितांनी व्यक्त केली.

दरम्यान, या संपूर्ण प्रकरणाला आणखी वेगळे वळण मिळाले असून, आमदार गोपीचंद पडळकर यांनी डीडीएसआर बिल्डर्स ग्रुपवर केलेल्या आरोपांच्या पार्श्वभूमीवर त्या ग्रुपचे संचालक यांचा त्यांच्या गावी सन्मान करण्यात आला. या सन्मान सोहळ्यात मोठ्या संख्येने समर्थक सहभागी झाले होते.

यावेळी सचिन मोटे यांच्या समर्थनार्थ जोरदार घोषणाबाजी करण्यात आली. “बिनबुडाचे आरोप करून समाजात संभ्रम निर्माण करण्याचा प्रयत्न केला जात आहे,” असा आरोपही काही वक्त्यांनी केला. तसेच, समाजातील उद्योजक आणि अधिकारी यांच्यावर होणाऱ्या अशा टीकेला एकजुटीने उत्तर देण्याचा निर्धारही व्यक्त करण्यात आला.

या आंदोलनात सर्व समाजातील पदाधिकारी, कार्यकर्ते आणि नागरिक मोठ्या संख्येने उपस्थित होते. संपूर्ण आंदोलन शांततेत पार पडले असले तरी, या घटनेमुळे परिसरात राजकीय वातावरण चांगलेच तापल्याचे चित्र दिसून आले.

एकंदरीत, या आंदोलनातून समाजातील विविध घटकांनी एकजूट दाखवत संबंधित व्यक्तींप्रती आपला ठाम पाठिंबा व्यक्त केला असून, भविष्यात अशा घटनांना तीव्र विरोध करण्याचा इशाराही दिला आहे.